کھڑقفی گوپا فڑولہ نی تم پو محمد تقیؑ
ان نفسی ہرژیسنہ نی دم پو محمد تقیؑ
کوس نلا عیسی سی ستروق بوربی شمی لہ دُعو
یا علی ؑ ان سک دُعو دم پو محمد تقیؑ
ژھوب بیسے نا چھون دوگید زیرس بڑوگی سی قاؤ بیسے
خلوکپی ابر رحمتی خنم پو محمد تقیؑ
سونگ نہ نیا نا خدا یاتی نیوینگ جوکسے یود
بخششی آبرو تھوبی یم پو محمد تقیؑ
ہلتوینگ نو کھیتی زوکسے دوک جوکسے ایکھی ژھوق کو نینگ
ان چھوسی میندوق ژھری ربم پو محمد تقیؑ
مؤمنی غدونگ مرفو گوے وجہہ بروز جزا
صبغت اللہ غدونی رم پو محمد تقیؑ
غدمس ازلینگ نا چوغی کھوقپہ لہ چھودفی ریرے
شاہ خراسان نہ ناس غدم فو محمد تقیؑ
قیصر و دارائی تخت مید نظرینگ لونگ مہ نی
زگوے زگو تھمی تھوب نرے شم پو محمد تقیؑ
تھونگ فی کھا نہ میول نلا سونگ چپو ذوالنون ژوخ
البتہ نجاتی من الغم پو محمد تقیؑ
حضرت داؤدی فیونگس ساز چونس پو حجاز
زیر حسینی ؑ کھا لزوقس بم پو محمد تقیؑ
ننگ ہرکونی ژھون پو شیشک ہلچے بوسی نی ستروق لہ تنگس
منس دوسے ہلچیو نا س علیا کھرم پو محمد تقیؑ
اونگمی نلا لق چہ مید شاہ شہیدانی شیدیا
سنینگ پو لا عباس ؑ لا گوید نیم پو محمد تقیؑ
