قبلہٴ حاجت روائی شاہ علی موسی رضاؑ
دردہا چکتوا دوائی شاہ علی موسی رضاؑ
لے چھوسی رگیمژھوے موتکنہ رگوی خنمی شربی نیما
قفل گنج مصطفائی شاہ علی موسی رضاؑ
شر سہ نا نوبسی امام نا زیور دنیا و دین
دون ژہری ستروق مرتضائی شاہ علی موسی رضاؑ
ژوخسہ ژوخ یود ما شہیدی تھیمبہ لا یانگ لا فروپا
بدون فچو نہ نیس کربلائی شاہ علی موسی رضاؑ
کعبہ لا بدونفچو طواف بیو پا ژہ تھوس چوکسید خداس
یری طواف چک لہ جزائی شاہ علی موسی رضاؑ
حضرت پیغمبری رینگچن وصی نا میگی عود
نیکھ جوق دست رضائی شاہ علی موسی رضاؑ
سید مرسل اپوچوے فیا ہرتنے ستروق یودی من
یانگ نلا مشکل کشائی شاہ علی موسی رضاؑ
تھون مچوک نیکھا دنیادینگ منت بیگانہ ہا
دوکسے یانگ نی آشنائی شاہ علی موسی رضاؑ
دی دنیادی چھوسکوری دور زمانینگ سکور نرے
نی نیوے یانگ ناخدائی شاہ علی موسی رضاؑ
نی سنینی کھوقکھولی ند پو دود چوگی بہر خدا
ندپو چکتوا یانگ شفائی شاہ علی موسی رضاؑ
ژامژے نیسپہ یودنسی نیکھ جوغی شزدے نظر
انما رگیزگوے گدائی شاہ علی موسی رضاؑ
فوق چوگی خان حیدریکھ حرمتی فیا احمدی
سایہٴ شزدے ہمائی شاہ علی موسی رضاؑ
