خدا نہ بڑن کنی رزمبو علی زین العبادؑ انسوک
ندانگلہ ند ژھدینگ تھم سو علی زین العبادؑ انسوک
خدائی حکمی کھہ مینگپو علی تخسید حسینی ؑ سی
خدا لہ فچول کھنی بیورپو علی زین العبادؑ انسوک
کھوری غدیانگمو کھورے نا فاطمہ دومبونگ تھیاغین شخصید
نبی رگا سکد کھوری منفو علی زین العبادؑ انسوک
کھو شامینگ شخفہ مید سوک نا درینگ گار یود پا اسلام چہ
حغی چھوس چھوسکورینگ سترونگفو علی زین العبادؑ انسوک
یزیدی خیبری کھر پو لزوغید خطبونی ہلوغی کھہ
اپو چو مرتضی لدنفو علی زین العبادؑ انسوک
کھوری برکت لایود کھڑانگسے سنا خنم پو کھوتی مل لا
خدائی شزدیونی شرکھو علی زین العبادؑ انسوک
فیاغی خشول لہ ہرمکھا گوئے من زہ چس تھون چوکس سومید کن لہ
اتی مل شرگو لہ ہلتاسفو علی زین العبادؑ انسوک
دعائینگ نو ہلتانید دنیاد لہ کھوانی کھوم لوکھی لم کن
نبی علمی چھومک بیونگ سو علی زین العبادؑ انسوک
یزیدی زیر فی بنگ پینگنو اپوچوئے مینگپو کوسفی کھہ
نبی ژھوخچس نا ان زیرفو علی زین العبادؑ انسوک
کھوری تھوالہ کھڑیلے دوکفینگ میونی ثاقبؔ لہ عزت بید
ندانگلہ محشری غدیانگمو علی زین العبادؑ انسوک
