بلبل نہ ژوخپو نر ان نوین ذکر بیو حسینی ؑ
مدحی ژھر ینگنو رگلبی بیوس شکر ژھو حسینیؑ
نا نیسپہ چن لہ می لدن ستودپا دینے خوجے لا
ہلتسنارے ہلژخمہ دخپو گوید مدح گو حسینی ؑ
خیرالورا اپوچو خیرالنساء زیزی ان
ریحان ان بہشتی خچسپہ ککو حسینی ؑ
سکومسے ردین چھو چد پی ردوسنینگ کنی رحم پو
ساقی حوض کوثر دوکسے ببو حسینی ؑ
ستروقنہ بوژھونگ نہ فونونگ در راہ حق منے نا
اسلامی ہلژخمہ چھوسپو ہلتوس زندہ بیو حسینی ؑ
عرشی ملک کنی یر جوا بیاسے کھیرس خدا لہ
سونگسے سنینی تمنافیقپولہ ہلتو حسینی ؑ
کھوانگ تھدپی فیا اپوچو مرکب فچوسینہ زگویدپا
مہر نبوتیکھا ہلتوس ملپہ رزیو حسینی ؑ
سِر یود دیبینگ نو کوسنا ملپہ رسولی فیقپو
سنینگ لہ متھیاقپہ نوید پا رگود پو نہ نو حسینی ؑ
سکیسپی بنیکھا سجدینگ شخسے خدالہ بڑنگ فو
یود سک ژھے جوکپوینگ سا سجدینگ نو گو حسینی ؑ
پیغمبری کسل یود سو اننہ حقسی مؤمن
کھوے سنینگ لہ توکسے دوگ پد کھوق کھولی میو حسینی ؑ
دنیائی گا سہ چکتو زالہ حرام اما
گاندلہ سمن خداسی بیس قبری سو حسینی ؑ
سترونگ مؤمنین یارب دنیا نہ آخرت لا
بیاسے وسیلہ جوا بید ژھون تھونفی رگو حسینی ؑ
نیسچن شجاع کھاینگ لہ ژھد من بکائی غدینگپو
نسپی ہرمکھونگ لہ سمن گیگ زدوگی چھینو حسینی ؑ
