بیوس ستودکھاستونگ ستونگ ہلژخمہ نا ہلژہدق اشیپی رگیازگولا
حمدو ستائش ستودکھا چوق مخصوص کھوری فیاق انمنا
کھڑاخنا شکر ستودکھے یر ی ناقص ہلچونیکھا پقزی نی
مین چانگ کمال نیسپہ چنی توفیق یانی سی منمنا
جن و ملک سونگنا ربیکھن خنم نا شجر لوح و قلم
جوہر لدنے دریا مچھمس شزدے تھوتھیک چانگ میدپنا
جیگسید عدالت لا یری ہسکے حشری تھانگ پوئینگ
یو دغدیانگسے بخشش پوا یری ملجأ و مأوا انمنا
القصہ تونگونگ چکتونی یود ہرتخپہ یاری ذات پو لا
گیوخسے بیوسی توبہ قبول یانگ قابلُ التوب انمنا
خنم نہ سہ نا ریونگ نا بحار چکتو لا نسپونگ تھونگسےنئی
خیانگ زن چھو زن بیک پا نیا امّارحیم یانگ انمنا
یانگ غافر الذنب انمانا یانگ کاشف الضر چا مگو
زبویک ہسکے حشرینگ نسپہ نی ستارالعیوب یانگ انمنا
ان یانگ جلیسُ الذاکرین محمودُ حمدِ الحامدین
مقصودُ کلِ تائبین معبود برحق انمنا
لایغفرُ الذنب الاھو لایخلقُ الخلق الا ھو
ستروق لزوقسے ذی روح چکتو لا یانگ حیّ و قیّوم انمنا
بیوس ہلژخمہ نی نامہ عمل کھرخچوکسے توبہ یے نلا
یودغدیانگسے نا بار خدا یانگ غافرالذنب انمنا
حکم خدا یود تونگ زیرے صلوات خوجونگنی کھا نالا
زیرس ناسی یا رب تونگ یانی نا دونگلا قابل میدپنا
صلواۃ دُرود تونگ رباخسے لے مؤمن کاکا فونونگ دوسے
غدیانگسے شفاعت احمدمختاری ؐعترت انمنا
ستروق فیونگمی وخپوینگ کھڑاق چوگی کلمہ شہادت لے خوجا
نا بوالفضل لا کھوم لوکھی برحق سند یو انمنا
