ستروقپو حسن ابن علیؑ کھہ نا فدا بین رگین چہ یود
پیغمبری میگی عود پویکھہ نی رگو بلافون بین چہ یود
مہر نبوت چھبجی ان شقشیدی خط پو یود یتینگ
ینگ لا سنانو فچوین چی نبی ینگ تھدپہ عفوا بین چہ یود
یری خدمتی خسون لوکھسی چھو تھونگمہ مہ تھوبفی سنینگ گڈینگ
یا لیتنی ژھن نین زیرین خضر نہ شیعونگ شین چہ یود
حاتم نہ یانگ توت تانگمانا حاتم کھڑیلے سینگ جوکسے یود
یری برکتی کھا میولی میونگ دخسن سا روزی زین چہ یود
زگو ہرژیک فونی زگو زگوا کھورے نی غدونگ لا تونگوی زگو مہ فیس
حاجت روائی زگو نلا سائل نوازی فین چہ یود
نی نامہ اعمال پوبینگ حسنے گیرے زیرے تریس نرے
ناسی حسنین کن ہلتہ نوک چاکھونگ عملینگ ہرژین چہ یود
مید ینگ بیا تھب چہ چنگ نلا دنیاد نہ عقبی نیسکو لا
یانگ نہ یری رینگچن ببی شزدیو ژہ لا نہ رین چہ یود
حبل المتینی ان کھورے دنیادی طوفانی سکلینگ
ہلچے تروق کنی ہلچق سکیوی جورینگ ناسہ نیافڑن شوخ فڑین چہ یود
دنیادی لالونگ ژھوق گیورے نی سنینگ لہ زوکپا نہ دوسے
نرگس نہ ژوخ مکپو فیسے یاری نظر چیا ہلتین چہ یود
مولائے من بزانی اشی قرض حسنے بیوس نلا
نی نفس امارہ بووسی ملا مہ جقپہ بدین چی یود
یری لعل نا ژوخ لیاخمو کھسو الماسیکھا خیو گیور بنا
سنینگپو پو پو سونگسے درونگ عباسی ؑ سنینگ لا ژھین چی یود
