ژھیو فڑالوکھ بیاسناسی یانگ نا بیورمو گوے ستودکھے مسونگ
یانگنی بخشش بیوس نی ہلچو یانگ ژالا ستودپی ہلچے مسونگ
یانی سی فچوسپین پہ نی سنینگپو یری فیا ننگ بیاسے
میولی بیسپونگ گنگسے نا یانگ شخفہ لا ملسے مسونگ
یخسنا خشا انپا یری رگیازگوے زگوتھیم پوے کھا خلنے
دینگ کشی مانگموے چھدے نا یانگ لہ کھوے سپلبے مسونگ
کھومفہ نا بید نا زگولانگ چی یانگ لہ چھیس کھن ان زیرے
تون بیاسےزگوارے بیاسے رگیازگوے کھہ برمید زگوے مسونگ
یودپی نمزو بڑونگس لے ستروق دے ہلژخمہ ذاتی ڑگیازگو لا
جوکتو گیودلوکھسی کھا زیربوپاژے دون لا ژھے مسونگ
اینپا خلدپوسا یری نوری عودی غبیل سپاربی فیا
دینگ دنیادی سیرفو مرفونگ گڑیمسے نا یانگژے مسونگ
یانگ لا جیگسے نوینچی میک کرفوے کھا لوکھنا انپا خشا
میگی چھو نیسپی رببی زگقسے نا یانگ لا فوے مسونگ
بیونگفہ مید جخچیک کسل بزانی اشی دو اننا سی
کھیانی تھیب گوڑگیال بیاسید ممتاز نالا کھیانگ خسوے مسونگ
