ہلچے لہ تم سنینگ لہ عقل ہلتوس اشی پاس بیر چوکسید
رگولہ ستروق مکپولہ تھونگمو چینے کھو سپیر چوکسید
سونی فرونگ لہ خنمی چھوی منمہ چوچو کھوسکلے نا
سے منگنی لقتو بورے خسوسینہ دونگ ژہر چوکسید
ہلتوسی کھوے حکمتی کھا بیانگژھیری کھوقپینگ نو چی بید
ہرکنی تِک پو دیبی ہلتوینگ بیانگ ہرژی بیاسے نر چوکسید
ہلتوسی کھوے سترونگ لوکھی بزو سترونگمی فری شاہ گلاب
ژھوغی نیزونگ لہ خلونی سکوربو زونے غدر چوکسید
دی دنیادی کژہ بینگ ژہن لہ دی مرموی ٹھوبی کھا
لزودی ہرکونگ بو ینگنو نیمی عود پو چینے سپر چوکسید
نانا زیرے کھونہ نمرودی شریک فچوسپی کھا
فشوے لق کھی کھا کھولا توتپہ چھدے خیار چوکسید
سے انوےفرونگ لہ بروگی ستروقپہ لا سکد فیونگسینہ
نم کھوری ہرمق روبنا ہلوق لہ رگی سپر چوکسید
ہلتوس عدالت پولہ کھوے سے غدونی کھا ببفی کھاؤ
ریونی سی فسقپہ نایرژہت کلینا غزر چوکسید
