مدح و صفت زیربو ہرژہمہ اشیونگ لا یود سونگسے عادت پو نی
ذاکر مسونگنا شاعر بیاسے یود ژھن نن صفت بین خوجی
لوبگے عمل نا درا ان زیرے یو د ہش گانگ علیؑ ستودکھا بیو
یود سوک حدیثینگ صحیح و سند لا خچسپہ نا رینگچن نبی
نا سونگسے عجمینگ نو غوٹ ژوخ بیا سے ژھیو ہلژابسے حمد پو مترانگ
فیونگنوک دوسے نا از حروف حلقہ یک حرف عین علیؑ
من کنت مولا کسل بیونگ نبی سی ہلژاہمہ اشی حکمی کھا
نا ان موالی یانگ ان نی مولا ان یانگ خدائی ولی
یری مینگپو لا دابۃ الارض زیر بو ژامپو سی یو تھیب شسید
شیر خدا زیرے نمزینگ نہ تخسید یانگ لا دے ژوخمید اشی
غالیونگنی یانگ لا خدا زیرے فچولبو تھیب مین لے شیر خدا
تصویر بیاسے یود یری بجی خنمی کھا قدسیونگ نی فچولفا فری
یری ستودکھی بحرینگنو طغرا نہ کاشی ژہیو چوق فڑسے تھونفہ مید
مخفی بیاسے یود منتخفو خسنگسے نا بین چی ذکر خفی
میثم بیاسے یود یانی سی ہرتخ تانگسے حق نا نا حق برفیسے
این وقت ہلال در این زمانہ فچوید میونگنی چھون متقی
موسی نا ہارونی نسبت پو تریانا ہرژہمہ نبی بیونگ کسل
ہارون لا نام سونگ لقب چی یداللہ شیر خدا یا علیؑ
عتبات لہ گیگ خسمسے یود پا تمنا فیونگ تونگو نی یا علی ؑ
بیک ند پو فلتے گیگ یمبو یالتے زیارت لہ خچسپہ خوجی
رگلفی نسوچوق یود ابن عباس خسمبنگ نو کھوانگ چھون بگیالے
تھونسوک پانا ہائے حسینی ؑ ضریح کھا دوکتوک پا نا غدونگ خلنے
