ہلتوس نی علیؑ لہ یر خداس کھوری مینگپو مینگنہ مینگ بیاسید
کھو،نا ،نا کھو ان زیربلا یعنی اشارہ دینگ بیاسید
نا سکور یری منتخ پویکھا نا یا علیؑ زیربی ریسی
نا نہ نیمور سونگفی بلونگ رین ژام ینی تھقرینگ بیاسید
افطار بیسپو بگیل بے مین وخ چکلہ ملسے بق چی لہ
بدری دے تھنگپو گنگ علیؑ تھونگسینہ میونی زینگ بیاسید
کفری سکھید لہ مے ہلچنے سترقس ذوالفقاری بلوغی کھا
اسلامی تبسونگ لا فیغی ابری ہوشی سنورزینگ بیاسید
غالیونگ لہ سونگفو مشتبہ حق ان ولی اللہ نا حق
اللہ سی رگوسکن ہلژنگسے کھولس کن یداللہ سینگ بیاسید
جنگل سونگسے میولپو چوق کھہ ختد ہبونی سوپ فنید
جور مید نلا یا شیرحق اِبسو یری فقرینگ بیاسید
دجال بیونگمی شومیکھا بونگبونگ رگیقسے کِید فنید
یانگ لہ مکوا چھق ہرژوا ہرکونے تازی ہرتہ وسی خینگ بیاسید
تھیوق نی نیانیونگ یانگ لے خوجا ہلژہمہ نونونگ تھدپی فیلا
کھونگ تھدپی فیا جبرئیلی سی فنگمینگ کھورے بینگ بینگ بیاسید
وونگنی مکر یود پونی بید ردوسپور یری کھیونگ لا دوسے
یانگ شیر حق لا ژھوربلا یومینگ نہ ناسی قینگ بیاسید
دوگسے نجف نا کربلا نی سنینگ پو لا سنینگ گڈ ہرتنے
چا پیر رہبانی شیدیا جقسے دیژے جق رینگ بیاسید
سنیا خپوکھما چھقسے غدینگ چھودے عباس علیؑ کھا غدینگسے نا
تاریخ تخلص نا دریسے عباسی نا غدینگمینگ بیاسید[۱۳۲۵ھ]
