سونگسے ٹھوب عالم پو گنگمہ چوبجی گنگمی لزود ستورے
گیور بنہ چوبجی امام خنم پو لوقپاری کھورے
انپہ ینگ نمزی امام نہ گا سومید کن لا ہلتاکھن
ہلژخمہ دخپوے بین عبادت ژھن نیما دنیا سکیورے
سامرینگ شخسے دوگیدپا دے چھوسی سنگ سنگ نیمو
معجزونگ جقلہ نونید پہ عسکری مینگپو بیورے
معتمد انپہ دے نمزی حاکم جابر شقی
ہرکنگسے سنینگ کھونپو مہ بیونگمہ یقس امام قیدینگ بورے
زگقپنہ امام حسن العسکری زندانینگ کھوس
چھو چھدے لوس اہل عالم میولی کھا رحمت ستورے
میونی غوفریاد پو کوانہ فیونگس امام قیدینگنہ کھوس
شخسے بیدنہ ینگ دعا بیاس خلوکسے چھو نمزا کھورے
بیاس اسیر ملعونی سی ینگ لقتو منس ظالم چیگی
یا تریکھا شخسے زندانینگ غدونی رنگپو گیورے
یا ظلم کن سق مہ ژہد پا معتصم ملعونی سی
توک مینے ہلژخمہ رگوبونگپو سنونپو سونگ رنگپو فسورے
بیاسپی شخمید کن بنی عباسی ربے کھیود مید نالا
ستور بنہ دے نور عود پو لوق چھوسی سمنگ ردو کھیورے
