شامینگنہ تھونے فیقلہ زیزی فاطمہ صغرا نوس بڑانگپولہ زدمسے
گا دومبہ ژہڑانگ چیکتو تھوسے لق کھوری مل لا کھیانگلا کھورے اونگس نا
شام کوفہ پونی ظلمی کھا ماریہ تھانینگنو خنمپونلا ردبسے
کھایری ہلژہمہ ببا ستورینہ ماریہ تھانی سو گویکھا بورے اونگس نا
کنگمی کھا درولے سونگسینہ گویکھا درولے لوقسے ستروق میدپی فوشنگ رگو
عالمپوژہ چیک نی بوژہ چیک نی علی اکبر فانگسے سکیورے اونگس نا
نین پو نئی ژہن سونگ ژہیلہ جق ہرژیسچہ گانی من ٹھوپ سونگسے دنیادپو
نی میگی تتہ کھیری میگی عود رینموچھے کاچو اکبر سکیورے اونگس نا
لے فاطمہ نا ژامژے زیروک میکلا چینونگ تھونگ رگونیکھا چینونگ تھون
نا نوین لزالہ نیزیکھا دونوک اکبری گو شام تھونیمن کھیرے اونگس نا
گیودپا نہ ژہڑانگپو لوسے شیمن کھوتی پینجیو نلا سترونگمہ مسونگفی
نا لوغینچہ ہلتین کھیری ببا نا اکبری پینجیا لقپہ سکورے اونگس نا
نی سنینگلا چہ گوید زیربو خدا چیکچی لہ ہرتخپہ دیکھنہ نری سنینگ لا
نلا اکبری دومبوسہ نی رسپانہ ہرکنگ لا تھونی من ژہورے اونگس نا
امت کونی پیغمبری حق کوقسے بوژہونگ لا بیاسپی دے نوروی زدیو
یلے کوفہ نہ شامینگ تھونیمن یول یولی یول لا میول لا سکورے اونگس نا
