کھیرس نرفہ ستنین آل رسولؐ شہر دمشقینگ دشمن ہلے رگیاقسے
سومید پی دے بلبس کونی کانگمونگ لہ بورے ہلچق کھونی ہرتے دونوتنگسے
دروازہٴ ساعت نہ نیمور تھونمنہ نیمبو نوس اہل حرم کن
دے کھوربی خنمی زینبی فیقپویکھا چنونگ تھون ینگ مے کھا مے ہرژقسے
یودپہ دے ستغویکھا تھونے مسلم ؑ اکوی سر پومدت چیگی دونلا
زینب نہ حسینؑ شاخفو تھونید نارے سلام بیاس لب پوفیسےگیوقسے
خوش آمدی خوش آمدی زیرینچہ جوفل بیاس عباس علیؑ گارشخس
قاسم نہ علی اکبری بخستونی خبرچہ زیرے کوانہ بوگخسے
عباس نہ علی اکبری فیقپونہ اسیرکن یود یمبولے فونو
قاسمی ہرتنہ نا سر پودریسے رے سکھیدینگ کھیرس بخمو نلا فانگسے
القصہ دے زگویکھانہ کھیرے ہرتوکھمیونی ستروغینچہ سر کنہ اسیرکن
درباریکھا تھونفی دے خپرونگ نا چہ بیاسے ہرژیک ینگ نی ہلچہ لا کھڑاقسے
عرشی فچوکھہ اینمی دے حسینی ؑ فیغی سر پو سہ جقسے پریکوینگ نو
جقس آل رسولؐ کنڈیری ہلژانگسے دے چھڑو کھی کھوانگ تخسی کھا سکیانگسے
