چھوسی رگیلفو حسینؑ شخفی برو ریس تھونے تھنگ لا
شخفا نہ ببا نوینچہ لزا لا بڑانگسے سکینہؑ
شخفانہ ببی تھوالہ کھریلے نوید پہ جوفول بین
سوی لقلہ سکیورے شخسید ببا یانی سکینہؑ
یود غدیانگمی نیمو یانگ ژا لوسے نا نیا سقلا
یانگ گیور بانہ نا سولا ببا زیربہ سکینہؑ
اصغر سودے چن یانی کھیدے شخسید ببا یو
نا زدیکپہ بونو شمری لغینگ فانگسے سکینہؑ
ہرتےکھا نہ سہ لا شوخسی ببا یود نی جوفول چی
گیوقسے یانی فانگمینگ نو کھوری ٹھنچہ سکینہؑ
نیانفہ ژے بیاسے فتولے بباس شخسے تھانینگ نو
شقفانہ ببا فوقسے سہ لا تروسے سکینہؑ
شہنگ اونگسے غوبین بید پہ جوفول سوئے قتلگاہ
سقپا فیسے عباس ؑ لہ جوفول بید پا سکینہؑ
شوخسی ببا عباس علیؑ دومبونگ لہ ہلتا نی
چھو مین زیرے نا یانگ لہ میزیر سکومنا سکینہؑ
خچسنہ رینی کھا خسوسے سترالے نا یدانی نا
ریس تھوبسے درینگ شمری ردونید برمید پہ سکینہؑ
ژھد زیر بہ محب ژامژے زیروک تھونفی ظلم کن
شمری تھوری ہرمو رگویکھا کھورے گیورے سکینہؑ
