شکر یا شزدےچن دخپو دی شخمید امتی لق نا
درینگ زہراء ؑ ساکھوم ظلمی ژھڑنگ نہ دومبہ نرفینگنہ
چہ زیر تھونفونگ دی رگیلموے کھا نلازیربا مکھیود ہلچے کھا
در و دیوار لا تریس زیربادچی بیاسے چھونگفو کھڑاق رگوینگنہ
اجازت میدپا جبرئیل لہ مجوکفو یا ستاغو مین پا
ختدے مے جوکس مسلمان کن تھونین دوگسے متریا مینگنہ
رسولی بضعۃ منّی زیرے ستودفی بونوے ستروق بیونگس
چھودےحسنین ناستریمونگ لازیزی مرتخ دنیادینگنہ
خُزینی زیربی سکت کوانا لوما دربانہ ژوخ زینب
تروسے فوقسے سلا فروفونگ نمور سونگ بیونگمو ستروق رگوینگنہ
خدایا! حیدری تھیاقپو، تھونے زہرائی کھا ڑدوقپو
کڑوژوسپو سونگسے تھونگ سنونپو، علی ؑستروق بیونگمو نیر رگوینگنہ
کھیرے حبل المتین چینگسے کھوتی بیعت لہ خلفاءسی
فوتے تونگ بوالحسن ؑ میدنا ہرکلونگ فیونوک نا پردینگنہ
علیؑ لا بیاس وصیت پو غسل مین ہے یانی ژھن لا
مکھیونگ دشمن جنازی کھہ مِرن اونگنارے نی سنینگ نہ
غسل منما شروع بیانہ علیؑ غوبین چہ کنس ڑگیانگنہ
شہید سونگفی ہرژینویودسوک علیؑ لاخسانگسےکھوے مینگنہ
ژھریکھا اونگسے بلبیس کن زیزی دیدار لا ہتلس نوین چی
حسینؑ بڑانگ برلہ زدمس فیونگسے زیزی فیاقلق کفنینگنہ
رسولی بیونگ کسل فونو! کھیونی لزوقسے امانت پو
بیوسی بخشش خوجا کھیونگسید امانت زخمی حالینگنہ
ابوالفضلی جدا سونگفی بیاغی فڑاقپونگ شفاعت لا
کھورے شخفی برو ڑگیلمو نا یود مِبجید زیرے غدیانگنہ
