غوبین تروسے فوغید پہ ژھرین فاطمہؑ زہرا رینگچن ببا خسمسے
کھوری خچسپہ ببی عرشی نا درا یودپی جنازو نوین بڑانگ پولا زدمسے
لے نی خشولی ان نا غدونی کھریل چھوسی رگیالفو میول نیسکوے پیغمبر
یانگ گیورے درینگ ہلتوس یری امت کنی غولہ ہرمق کھوقکھولی دمسے
تھون دیبہ نا انصار نا مہاجر چوغی غوبین زہرائی ستاغویکھا
سو شیر خدا لاکھریلے نوین سو حسنینی ترانگ خیون پولا تھمسے
یونگ چوقپہ فیسے حضرت زہراسی کسل بیونگ نوین ہلژخمہ ببا لا
نا فانگسے سومید بیاسے سکیورے شخسا ببا یو جنت یانی غدمسے
تا دیولا دیکھا دوکپا میکھیود شہر مدینیگ یری زدیکپہ بونو لا
نا سنگ یری لزایمبو کھیری خچسپہ زیزی فیا سومید زیرے خسمسے
دوی منہ حسن ؑ نا دریسے خچسپہ حسینی ؑ ہرژیگنگ نو کسل بیونگ
ہلتوس یا اپوچو یانگ گیورے تھونسید تا نئی کھا ہرمق کھوقکھولی دمسے
سونگ لوقپہ قیامت بنی ہاشمی نانینگنو دے زدوکپونی غویکھا
مردان و زنان خورد و کلان زدوگی ژھگیدپہ سنینگ کون چوغی سکمسے
سلمان نا بلال بوزر و عماری غوبید پہ لے رگیالفو زیرین چی
نیاینگ ژالے گار گوا لے خوجا شیک تا درینگ نا یری کھوقکھولی چھمسے
