آدم ببا پا سلسلہ یار تھلفو محمدؐ
عالم نہ ہرپدے حجتی کھا ڑگیلفو محمدؐ
کھوانگ رنمی دے لس بزو ژا خداس ژلفو محمدؐ
اسلامی علم ہلژنگسے کفر سنیالفو محمدؐ
عالم نی نبی نوری عودی کھا لدنے سینگ فیل
چھوا ملسہ چھومک تھوب میلا سا دوکسہ بیاسے شیل
موسی ید بیضا سہ کھوری نوری عودی غبیل
عالم پولا رحمت بگوسینا کڑالفو محمدؐ
عیسائی کرامت نہ دہ رت تا ہرتہ رتیکھا
بونگبو نا براق تنگسے زدورے قرب رتیکھا
بوگبو نا براق سونگ ہرتہ نا بونگبو سہ رتیکھا
قوسین دنائینگ دہ پژے تھلفو محمدؐ
میول گنگمہ خداسی یری لقپینگ نو بورین چی
یود پو چی عجب خلونگ یری تم نیانلہ سکورین چی
خنم یود پنا یاری چوکی لا زگوسے کھورین چی
نوبفی نیما ینگ لوقپہ خنمینگ سکلفو محمدؐ
میدپانہ معوذتینی کھا بیس یری سمن پو
طاہائی عزت تھوبفو سو ان یاسینی لن پو
کھم چنگمہ نا دنیائیکھا ہلتوا برق چینی من پو
شام و سحری یرنہ زانو کلفو محمدؐ
مید نارے سولا مک لا غشاوی چدے بربن
واللیل نا و الشمس اشیانگ ایونگ نیمہ نا ژہن
ہلتوس ہجرتی ژہنلہ نیمہ گرمفق سہ سکیورے فین
گویکھا سہ بورین ہرمقپولا مہ خسلفو محمدؐ
یانگ ریخسہ نا ژہنگسی کھا لدنے منع نقیض چقس
ینگ معتمد الحق بیاسے ہرپوکھمی کھا مہر یقس
دوگسے یری لق لوح و قلم امیّ عجب تقس
دفتر خسومی کھا قط بیاسے دونگ سکیلفو محمدؐ
آیات برائت تُھوربیاسے یرنا تھورو ببسے
کفاری رگونا گونگ یداللہ سی ردبسے
نیزی کھورے ردبشینگ کفری بل لا چھو تبسے
رال فسید پنا ژوخ ردبسے کفر ہرملفو محمدؐ
لولاک کلے یرنا اشیپاسی کھولہ ترن کن
یودکھوے روزی زین چھوینی نیہ نا سے بری سترن کن
بیسپی عملی لیخمو جواہر کنی رِن کن
امت کنی نسپی بولو نینگ خچلفو محمدؐ
سونگ ناسا الستی کھا چوغی لزا بیاسے ہرمق جوک
دنیائی روزیو بگوید زیرے کوانہ بیاسے بگیوگ بگیوک
ناگیگ نرے دنیائی روزیو سینگ بگوسے مید سوک
منس آل عبا نہ نلا بگوسکلپو محمدؐ
غزون نا مکری سپون نا بگیو کھلبی اپنی نا چھد
نا یندری ژوخ سکوتپہ لا کھورس تھیقسے دیبی خند
تونگوے لمی کھا کنگمہ کھِرسے سونگ نرے سنینگ گڈ
گیک مشکلی گڈ کن لہ نلا حل پو محمدؐ
ناسی یتی رگیزگو ژہ کھورے یود سنینی غدینگسے
نری کنگمہ نا لقپونگ سہ میقپا چدے فنگسے
لق لینس دوسے دنیائیکھا نا وسوسہ فانگسے
عباس علیؑ بیک کھری توکھ گرلپو محمدؐ
