جق پہ جق میولپو بجگین یود یا شہ آخر زمان ع
میونگ مچیکپونگ نہ چیگین یو یا شہ آخر زمان ع
بیونگسے ہلتون پردینگ نہ شزدے فرودموچن غدونگپو خوجا
ژھیرتراغی مینگنو ژھیگین یود یا شہ آخر زمان ع
مید دی تھل ژھن پوینگ خشی مے سکرچہ کھوانگسہ لے خوجا
خش رگالوکھہ چھمسے ربیدین یود یا شہ آخر زمان ع
کھوقکھولی چھوربیکھا تھونسید ہے نئی غدیانگمی نیو
چھوسکورینگ فوقسے خمیدین یود یا شہ آخر زمان ع
جق خسومی غدیانگمیدپی لالی رنگ ہلتسے غدینگ کھوربامید
ژھیو گلاب چوبجی تری بین یود یا شہ آخر زمان ع
نا یری رگیازگوے ہی کھی ان مینڈوی خشی فانگمی غدیانینگ
غدونگ خلنے سیکھا ریلین یود یا شہ آخر زمان ع
کھوقکھولی ردیبسے نہ خنم پو خسم زونی سترنگ لا بودے
خسونلوکھی رگیانگ پو ردبین یود یا شہ آخر زمان ع
بزورلوکھی چھوئینگ زبانگسے نہ نیسپی ترنا فیونگمن زیرین
ژامپوسی چھوس پو ژیرین یود یا شہ آخر زمان ع
سپیانکونی بخسپہ گونے لوی میک ژھوسے جوکسے برینگ
کھسمنی ستروق کن فسلین یود یا شہ آخر زمان ع
سکے چدے رنگ چھا سکولے لزینگ بر فیسے روسپونگ نہ شہ
فیونگسے نہ ہرکنگ چوق جبین یود یا شہ آخر زمان ع
برو، ژے نق،چھستر نہ ینگ نس برفیسے فیونگنوک زیرے
چھوس فیالوینگ تانگسے فسگین یود یا شہ آخر زمان ع
