ستونگ نشو ہرژبجی نہ لکھ چیک ژا نبیونگ تانگسید سوک
چوغی لزا تانگسے نا احمد نبی سینگ ژھانگسید سوک
کھیرے فوقتوکپہ دنیاد مید نارے کھوانگ گیاب ان لا
کھونا کھوے ہلژحمہ بوژھونگنی فری میول کھڑنگسید سوک
خنمی ربو میِنگ نہ ستادے کھیونگ اشی پاسی بوسے کھوانگ
لزود نیما سی کھوری عودیکھا کریول سکانگسید سوک
خضری آب حیات تھونگس نی نبی سکومسی کھاسو
کھوری ابری ھوشی کھا باغ جنان بانگسید سوک
یری معراجی جغینگ لوقپی رگنو میدنارے
سہ سا کھوانگ سے کھا مخاٹپا یری لزا بڑانگسید سوک
یری لقپینگ نو مینے یود اشی پابرکت سینگ
جابری نیس دوبیکھا خندقی ہرمق درانگسید سوک
محشرینگ نفسی زرین چی سغی بوکھمی کھا کھورین
انبیاء کن سا یری جوالا ریسے لانگسید سوک
یری تھوقنا نیا اسمن بیاسے رین ستونگ چیک ستروق
نایی مینگ ژھیکپانا یانگ دوزخمی میو گڑانگسید سوک
کھوے سنینگ لدنفی ہرمکھولا یانی سکوس مرہم چی
یری عباسی حسینی ؑ فیلا نوین بڑانگسید سوک
